Alcohol a’ch corff

Mae effeithiau alcohol ar yr ymennydd yn cynnwys siarad yn floesg, methu symud ac ymateb, a methu cofio digwyddiadau. Dros y blynyddoedd, mae yfed trwm yn gallu achosi niwed difrifol i gelloedd yr ymennydd.

Gall yfed gormodol waethygu symptomau sawl math o afiechyd meddwl. Yn benodol, mae’n gallu arwain at iselder a phryder.

Os byddwch chi’n yfed mwy nag 14 uned yr wythnos yn aml, bydd mwy o berygl i chi ddatblygu canser y geg, y llwnc, corn y gwddf, a’r bibell fwyd. Bydd y perygl yn fwy fyth os byddwch chi’n smygu hefyd.

Mae cryn dystiolaeth erbyn hyn fod cysylltiad rhwng yfed yn gymedrol a lleihau’r perygl o rai o glefydau’r galon a chylchrediad y gwaed. Er hynny, os yfwch chi fwy na 14 uned yr wythnos mae’r perygl yn tyfu, ac mae yfed yn drwm yn gallu codi pwysau’r gwaed a chynyddu’ch perygl o gael strôc.

Mae mwy na 50 o astudiaethau wedi cadarnhau bod alcohol yn ffactor peryglus ar gyfer canser y fron yn arbennig. Mae’n debyg fod alcohol yn gwneud i’r corff greu mwy o’r hormon estrogen, ac mae gormod o estrogen yn gallu troi celloedd y bronnau’n ganseraidd.

Mae yfed gormod yn gallu achosi llid y stumog ac wlserau, yn ogystal ag achosi i fwyd ac asid gael eu gwthio yn ôl i fyny’r beipen fwyd.

Mae yfed trwm hefyd yn gallu cynyddu’r perygl i chi ddatblygu canser y stumog neu’r perfeddion.

Mae’r rhan fwyaf o’r alcohol sy’n mynd i mewn i’r corff yn cael ei brosesu gan yr afu. Os oes rhaid iddo weithio ar ormod o alcohol, bydd iechyd yr afu yn gwaethygu.

Dros amser hir, mae yfed gormod yn gallu arwain at afu fras, llid yr afu, creithio, a hefyd canser yr afu.

Gall dynion ddioddef anallu rhywiol dros dro ar ôl goryfed. Dros amser hir, mae yfed trwm yn gallu achosi i organau rhywiol dynion a merched grebachu.