Cryfder: 0.0%
Calorïau ymhob 100ml: 35
Mae’r bragwyr rhyngwladol AB InBev eisoes yn adnabyddus yn y farchnad ddi-alcohol am ddiodydd fel Becks Blue a Budweiser Zero. Mae’n bosibl fod Jupiler 0.0, a ddaeth yn rhan o’u portffolio yn 2016, yn llai adnabyddus yn y wlad yma.
Ond brand o bwys mawr yng Ngwlad Belg yw Jupiler, lle mae’r bragdy’n noddi uwch-gynghrair pêl-droed y wlad a hefyd y tîm cenedlaethol. Wedi blasu’r cwrw yma, gallwn ni ddeall pam mae e mor boblogaidd. Yn blwmp ac yn blaen, lager da yw hwn. Mae’r lliw’n dda, yr arogl yn dda, a’r blas yn dda, gydag awgrym bach o berlysiau. Os cwrw melyn yw eich peth chi, fydd hwn ddim yn eich siomi.
Gwnaeth Jupiler hysbysebu eu cwrw unwaith trwy ddangos criw o ddynion yn dringo mynydd er mwyn chwarae pêl-droed ac yfed cwrw. Does dim rhaid i chithau fynd cyn belled â hynny er mwyn cael gafael ar Jupiler 0.0. Gallwch chi ei brynu trwy Dry Drinker, un o nifer o siopau ar-lein sy’n cwrdd â’r galw cynyddol am gwrw di-alcohol o safon.
