Inch's 0.0 cider

Cryfder: 0.05%

Calorïau ymhob 100ml: 25

Mae Inch's yn bennaf adnabyddus am eu seidr afalau canolig ei flas. Maen nhw’n cadw at eu hegwyddorion ar gyfer y seidr di-alcohol yma, gan ddefnyddio afalau ffermydd o fewn cylch deugain milltir i’w melin seidr yn sir Henffordd.

Mae’r ddiod yn creu argraff gyntaf dda gyda chaniau lliwgar sy’n denu’r llygad. Mae lluniau gwladaidd y label yn codi’r awydd am fynd am dro hamddenol trwy berllan – yr haul ar eich wyneb, aroglau afalau’n aeddfedu, a phicnic ar y gwair, efallai!

Yn anffodus, dyw’r ddiod ei hun ddim cystal â’r can. Er ei bod yn tywallt yn braf iawn, gyda lliw euraidd a digon o fwrlwm, mae’r blas yn arbennig o felys – mwy tebyg i sudd afalau na seidr. Does dim brathiad na chymhlethdod sych, ac mae’r cynffon y blas yn ymylu ar surop.

Dyw hi ddim yn ddiod annymunol, ond mae’n brin o’r cydbwysedd a dyfnder sy’n nodweddu seidr traddodiadol. Efallai bydd hi’n plesio’r rhai sy’n chwilio am ddiod ysgafn ffrwythus, ond mae’n bosibl na fydd hi at ddant caredigion seidr.